پەرەگراف
كۆمەڵەی پیشەسازیی نەوتی كوردستان (ئەپیكور)، ئامادەیی خۆی بۆ "بەپەلە" دەستكردنەوە بە گفتوگۆ بۆ دەستپێكردنەوەی هەناردەی نەوتی هەرێمی كوردستان ڕادەگەیەنێت، بەڵام بە مەرجی "پاراستن"ـی مافە داراییەكانیان.
كۆمەڵەكە ڕاگەیەندراوێكی لەبارەی كۆبوونەوەكەی سەرۆكی ئەمریكا سەرۆكوەزیرانی عێراق بڵاو كردووەتەوە و تێیدا دەڵێت "كۆمەڵەی پیشەسازیی نەوتی كوردستان پێزانینی هەیە كە سەرۆك بایدن و سەرۆكوەزیران سوودانی لە كۆوبوونەوەكەیاندا، جەختیان لەسەر دەستپێكردنەوەی خێرای هەناردەی نەوت لە ڕێگەی بۆریی نەوتی عێراق - توركیا كردووەتەوە".
ڕاگەیەندراوەكەی ئەپیكور پاش ئەوە دێت كە دیلان غەفوور، سەرۆکی لیژنەی پەیوەندییەکانی دەرەوە لە پەرلەمانی عێراق و ئەندامی شاندەکەی عێراق لە ئەمریكا، بۆ پەرەگراف ئاشكرای كرد "ئەنتۆنی بلینکن، وەزیری دەرەوەی ئەمریكا داوای کرد هەناردەی نەوتی هەرێمی کوردستان دەست پێ بکرێتەوە و بەربەستەکانی بەردەم ئەو پڕۆسەیە چارەسەر بکرێن".
ئەپیكور كە لە كۆمپانیا بیانییەكانی بەرهەمهێنەری نەوت لە هەرێمی كوردستان پێك دێت، دەڵێت "ئامادەین بۆ بەردەوامیدان و بەپەلە دەستكردنەوە بە گفتوگۆكان لەگەڵ حكومەتی عێراق و حكومەتی هەرێمی كوردستان، بۆ دەستپێكردنەوەی هەناردەی نەوت لە ڕێگەی بۆریی نەوتی عێراق - توركیا".
ئەپیكور هاوكات جەخت لە پاراستنی مافە داراییەكانی كۆمپانیاكانی كۆمەڵەكە دەكاتەوە و دەڵێت "لە ڕێگەی ڕێككەوتنێكی نووسراو و فەرمییەوە دڵنیایی بدرێت لەبارەی وەرگرتنی پارەی نەوت لە ڕابردوو و بۆ داهاتوویش".
بەپێی لێدوانی مایڵز كاگینز، وتەبێژی ئەپیكور، كۆمپانیا ئەندامەكانی ئەپیكور بە قەبارەی 10 ملیار دۆلار وەبەرهێنانیان لە سێكتەری نەوت و غازی هەرێمی كوردستاندا كردووە. كاگینز دەڵێت "ئەمەش هاوكار بووە لە بەدەستهێنانی ئامانجەكانی سەرۆكوەزیرانی عێراق محەمەد شیاع سوودانی لە بواری نەوت و گاز، كە لە كۆبوونەوەی لەگەڵ سەرۆك بایدن لە كۆشكی سپی ئاماژەی پێ داوە".
"كۆمپانیا ئەندامەكان لە ئەپیكور، زۆر ڕژدن لە بەردەوامیی هەماهەنگییان لەگەڵ حكومەتی عێراق و حكومەتی هەرێمی كوردستان بۆ دەستپێكردنەوەی هەرچی زووتری هەناردەی نەوت لە ڕێگەی بۆریی نەوتی عێراق - توركیا"، كۆمەڵەی پیشەسازیی نەوتی كوردستان (ئەپیكور)دا لە كۆتایی ڕاگەیەندراوەكەیدا وا دەڵێت.