میترۆ: لە یادی ڕۆژنامەگەریدا لە هەولێر و سلێمانی بە كۆمەڵ ڕێگری لە تیمەكانی میدیا دەكرێت
پەرەگراف
سەنتەری میترۆ ڕایدەگەیەنێت "لە یادی ڕۆژنامەگەریدا لە هەولێر و سلێمانی بە كۆمەڵ ڕێگری لە تیمەكانی میدیا دەكرێت ڕووماڵی دوو چالاكی بكەن". سەنتەرەكە ڕوو لە بەرپرسانی هەرێمیش دەڵێـت "بە پەیامی پیرۆزباییەكانتاندا بۆ یادی ڕۆژنامەگەری بچنەوە".
ئەمڕۆ 22ـی نیسانی 2024، لە یادی ڕۆژنامەگەریی كوردیدا، لە شارەكانی هەولێر و سلێمانی ڕێگری لە تیمەكانی ڕاگەیاندن كرا ڕووماڵی "كۆنگرەیەكی سەندیكای ڕۆژنامەنووسان و گردبوونەوەیەكی ڕۆشنبیران" بكەن.
سەنتەری میترۆ بۆ داكۆكی لە مافی ڕۆژنامەنووسان لە ڕاگەیەندراوێكدا دەڵێت "بڕیار بوو ئەمڕۆ لەبەردەم ئۆفیسی سلێمانیی ئەنجوومەنی نوێنەرانی عێراق، ڕۆشنبیرانی شاری سلێمانی نامەیەكی ناڕەزایی لەسەر سەردانی سەرۆككۆماری توركیا بۆ عێراق و هەرێمی كوردستان بدەنە نوێنەرایەتیی پەرلەمان، بەڵام هێزی ئەمنی ڕێگریی لە گردبوونەوەكە و ڕووماڵكردنی كرد، تەنانەت یەك وێنەش بچركێت".
ڕاگەیەندراوەكەدا هاتووە "هەر ئەمڕۆ بە ئامادەبوونی سەرۆكی حكوومەتی هەرێمی كوردستان، دیداری نێودەوڵەتیی هەولێر بۆ كاری ڕۆژنامەنووسی بەڕێوەچوو، كە سەندیكای ڕۆژنامەنووسانی كوردستان و فیدراسیۆنی نێودەوڵەتیی ڕۆژنامەنووسان ڕێكیان خستبوو، ڕێگری لە تیمەكانی ڕاگەیاندن كرا بچنە هۆڵی كۆنگرەكە".
میترۆ ئاماژە بەوە دەكات كە "ئەم ڕێگرییانە لە تیمەكانی ڕاگەیاندن لە كاتێكدایە كە زۆربەی دەستەبژێری سیاسیی هەرێم لە بروسكەكانیاندا بەبۆنەی ڕۆژی ڕۆژنامەگەریی كوردی، جەختیان لە پاراستنی ئازادیی كاری ڕۆژنامەنووسی كردەوە".
سەنتەری میترۆ وێڕای "سەركۆنەكردن"ـی هەموو جۆرە ڕێگری و جیاوازییەك بەرامبەر پەیامنێرانی كەناڵەكانی ڕاگەیاندن، داوا لە هەموو ئەو سەركردانە دەكات كە پیرۆزباییان لە ڕۆژنامەنووسان كردووە "بە پەیامەكانیاندا بچنەوە" و دەڵ ێت "وەڵامی پرسیارێكی سادەمان بدەنەوە: ئایا پەیامەكانتان لەگەڵ ئەو ڕەفتارانەی هێزە ئەمنییەكان دەگونجێت؟".
ڕێگرییەكان لە ڕۆژنامەنووسان لە كاتێكدایە كە ئەمڕۆ ساڵیادی ڕۆژنامەگەریی كوردی بوو و بەرپرسانی هەرێم پەیامیان بەوبۆنەیەوە بڵاو كردەوە، لە پەیامەكانیاندا جەختیان لە "ئازادیی
نێچیرڤان بارزانی، سەرۆكی هەرێمی كوردستان، لە ساڵیادی ڕۆژنامەگەریی كوردیدا وتی "داكۆكی لە زەمینە و ژینگەی هاندەر بۆ كاری میدیایی، كارئاسانی بۆ دەستگەیشتنی ڕۆژنامەنووسان بە سەرچاوەكانی زانیاری بەبێ جیاوازی و دووركەوتنەوە لە سەپاندنی كۆتوبەند و سانسۆر بەسەریاندا دەكەمەوە". وتیشی "دەبێ لایەنە پەیوەندیدارەكان بەپێی یاسای ڕۆژنامەگەری لە كوردستان مامەڵە لەگەڵ هەر كەیسێكی بواری ڕۆژنامەوانیدا بكەن".
هاوكات مەسرور بارزانی لە پەیامێكدا بۆ 126هەمین ساڵیادی ڕۆژی ڕۆژنامەگەریی كوردی دەڵێت "جێی خۆشحاڵی و شانازییە كە ڕاگەیاندنكاران لە هەرێمی كوردستان و لە سایەی حكومەتی هەرێمی كوردستاندا، بە ئازادی و بێ هیچ سانسۆرێك، كاری پیشەیی خۆیان دەكەن و تەواو ئازادن لە ڕەخنەگرتن و باسكردنی پێشێلكارییەكان و كەم و كورتی و كەمتەرخەمییەكانی حكومەت".
سەرۆكوەزیران دەشڵێت، حكومەت وەك هەمیشە هاوكار و یارمەتیدەری ڕۆژنامەنووس و ڕاگەیاندنكارانی كوردستان دەبێت بۆ ئەوەی بە هاوكاریی هەموو لایەك، بتوانن كوردستان لە هەموو بوارەكاندا، بەرەو قۆناخێكی پێشكەوتووتر ببەن، "پێویستە میدیاكارانی كوردستان، هەمیشە لە بەرەی نیشتماندا بن و ڕێگە نەدەن بە ناوی ڕۆژنامەگەرییەوە، سووكایەتی بە بەهاكانی نیشتمان و بەرژەوەندییە باڵاكانی خەڵكی كوردستان بكرێت و نابێت زمانی زبر و دیاردەی ناشرینی ناوزڕاندنی خەڵك بەكار بهێنرێت".
هەروەها قوباد تاڵەبانی، جێگری سەرۆكوەزیران، لە یادی ١٢٦ساڵەی دەرچوونی یەكەم ڕۆژنامەی كوردی كە ڕۆژی ڕۆژنامەگەرییە دەڵێت "ئەركی حكومەت و دەسەڵاتی سیاسییە كێشە و كەموكوڕییەكانی بەردەم ئازادیی كاری ڕۆژنامەگەری چارەسەر بكات، یاساكانی كاری ڕۆژنامەگەری و مافی دەستخستنی زانیاری وەكوو خۆی جێبەجێ بكات و گۆڕانكاری لە شێوازی مامەڵەكردنی هێزە ئەمنییەكان لەگەڵ ڕۆژنامەنووساندا بكات".
پێشێلكردنی ئازادی ڕادەربڕین و ڕۆژنامەگەری كێشەیەكی بەردەوامە لە هەرێمی كوردستان. بەپێی شیكارییەكی پەرەگراف بۆ ئامارەكانی سەنتەری میترۆ بۆ ماف و داكۆكیكردن لە ڕۆژنامەنووسان، لە ساڵی ٢٠٢٣دا بە تێكڕا هەفتانە پێنج پێشێلكاری ڕوویان داوە.
لە ڕاپۆرتی سەنتەری میترۆدا 249 سەرپێچی لە ساڵی ڕابردوودا بەرامبەر 274 ڕۆژنامەنووس و دەزگای ڕاگەیاندن خراونەتەڕوو.