پەرەگراف
هەڵمەتی هێزە ئەمنییەكانی بادینان بۆ دەستگیركردنی ڕۆژنامەنووس‌و چالاكان بەردەوامە، گۆهداری زێباری ڕۆژنامەنووس‌و شڤان سەعید چالاكی مەدەنی، ئەمڕۆ دەستگیر كران.
سەرباری ڕەخنەو فشاری ناوخۆیی‌و ڕێكخراوە نێودەوڵەتییەكان بۆ كۆتاییهێنان بە دەستگیركردن‌و هەڵكوتانەسەر ماڵی ڕۆژنامەنووس‌و چالاكان، بەڵام حكومەتی هەرێم‌و دەسەڵاتدارانی بادینان گوێ بە فشارەكان نادەن.
پۆلیسی دهۆك لە ڕاگەیەندراوێكدا دەڵێت: دەستگیركراوانی ئەمڕۆ بە فەرمانی دادوەر بووەو بێڕێزییان بەرامبەر نەكراوە.
هاوڕێیەكی نزیكی گۆهدار زێباری، بۆ پەرەگراف وتی "گۆهدار ئەمشەو لە ماڵی خوشكێكی بووە لە ئاكرێ، ئەمڕۆ هێزێكی دەمامكداری پارتی بە چەكەوە چوونەتەسەر ماڵی ئەو خوشكەی‌و گۆهداریان بە چاو بەستراویی بۆ شوێنێكی نادیار بردووە".
ئەو هاوڕێیەی وتیشی "گۆهدار خۆی ماڵیان لە ناحیەی دینارتەی سەربە ئاكرێیە، نازانرێت ئێستا لە كوێیەو هیچ بە كەسوكارەكەی نەگوتراوە".
گۆهدار لە ماڵپەڕی وڵات كاری ڕۆژنامەوانیی دەكات‌و پێشتر لە كەناڵەكانی ئێن ئاڕتی‌و سپێدە كاری كردووە، ئەو هەفتەی ڕابردوو لە سلێمانی بەشداربوو لە ۆركشۆپی خولێكی ڕاهێنانی پەرەگراف بۆ ڕۆژنامەنووسان كە وەزارەتی دەرەوەی ئەڵمانیا پاڵپشتیی دەكات.
گۆهدار لە ۆركشۆپەكەی پەرەگراف
زیاتر لە دوو مانگە بادینان بە دۆخێكی نائاساییدا تێدەپەڕێت بۆ ڕۆژنامەنووس‌و كەسانی چالاكی مەدەنی‌و ڕەخنەگر، هێزە ئەمنییەكان بە هەڵكوتانەسەر ماڵان‌و دەستگیركردنیان ڕەوشێكی پڕ لە ترس‌و تۆقاندنیان دروست كردووە.
"بەرەبەیانی ئەمڕۆ ڕێككەوتی 22-10-2020 چەند هێزێكی چەكداری دەمامكدار بە شێوازێكی ترسناك چوونەتە سەر ماڵی برای من مامۆستا (شڤان سەعید بەڕۆشكی) لە دهۆك و دەرگای ماڵەكەیان شكاندووەو لەبەرچاوی هاوسەرو مناڵەكانی بە لێدان و جلی خەوەوە ڕفێنرا" ئەیهان سەعید، چاودێری مافی مرۆڤ لە نامەیەكی كراوەدا وادەڵێت.
ئەیهان ئەوەش دەخاتەڕوو، براكەی بێجگە لە ڕاوبۆچونی جیاوازو ڕەخنە ئاساییەكانی، هیچ تاوانێكی نیە، بۆیە داوادەكات دەستبەجێ ئازادی بكەن، "داوا لە پەرلەمان، ڕێكخراوەكان و دەستەی مافی مرۆڤ، UN، كونسوڵەكانی وڵاتان لە هەرێم دەكەم چارەنوسی براكەم و گشت زیندانیانی ڕای جیاواز ئاشكرا بكەن و فشار بكەن بۆ ئازادكردنیان، ئەم پرۆسە نایاسایی و نادیموكراسیە لە بادینان بوەستێنن".
ئەیهان لە نامەكەیدا ڕەخنەی تووند لە سەرۆكی حكومەت دەگرێت‌و دەڵێت "پێویستە مەسرور بارزانی چەكدارو عنتەرەكانی لە بادینان بوەستێنیت، كە كەوتونە گیانی ڕۆژنامەنوس و چالاكوانان، ئەگەر ئاگاداری ئەوەی جەنابت بەرپرسیاری بەرامبەر ئەم كارو زوڵمەی حزبەكەت دەیكات و خۆت سەرۆكیانی، ئەگەر ئاگادار نیت ئەوە كارەساتە ئاگات لە حزبەكەت و پارێزگارەكەت نیە! ئەمە كەی ئەخلاقی حوكمدارییە بە چەكەوە لەبەرچاوی مناڵ و لێدان خەڵك بڕفێنن".
چەند كاتژمێرێك دوای بڵاوبوونەوەی هەواڵی دەستگیركردنی ڕۆژنامەنووس‌و چالاكانی ئەمڕۆ، پۆلیسی دهۆك ئەمشەو لە ڕاگەیەندراوێكدا ئەوەی ڕەتكردەوە بێڕێزی بەرامبەر تۆمەتباران كرابێت، "بەهیچ شێوەیەك ئەوەی لەوبارەیەوە وتراوە ڕووی نەداوەو دوورە لە ڕاستییەوە، هەندێك كەس و لایەنی تێكدەر هەوڵی تێكدانی ڕەوشی ئارامی پارێزگای دهۆك دەدەن‌و بۆ شێواندن‌و شاردنەوەی ڕاستییەكان ئەو هەواڵانە بڵاودەكەنەوە".
پۆلیسی دهۆك بەبێ ئەوەی ناوی دەستگیركراوان ئاشكرا بكات، ئاماژە بەوە دەكات، بەپێی ماددەی 221 لە یاسای سزادانی عێراقی-ئەو ماددەیە تایبەتە بە هاندانی خەڵك بۆ گردبوونەوە-، فەرمانی دەستگیركردن لەلایەن دادگاوە بۆ چەند تۆمەتبارێك دەرچووەو ئەمڕۆ جێبەجێ كراوە، "وەك هەر حاڵەتێكی ئاسایی، ئەوكەسانەی دەستگیركراون بە ڕێزگرتن‌و بەپێی یاسا ڕەوانەی دادگا كراون‌و بە جوانترین شێوە مامەڵەیان لەگەڵدا كراوە".
ڕاگەیەندراوەكەی پۆلیسی دهۆك لەكاتێكدایە، ئەیهان ڤیدیۆیەكی ماڵی شڤانی برای بڵاوكردووەتەوەو تێیدا منداڵەكانی باس لە هەڵكوتانەسەر ماڵیان‌و خراپیی ڕەفتاری هێزە ئەمنییەكان دەكەن.
سەنتەری میترۆ بۆ داكۆكی لە مافی ڕۆژنامەنوسان داوا دەكات بە ڕوونی هۆكاری دەستگیركردنی گۆهدار زێباری و شڤان سەعید ئاشكرا بكرێن.
ڕەحمان غەریب، ڕێكخەری سەنتەری میترۆ دەڵێت "لە مامەڵەكردنیان لەگەڵ چالاكوان و ڕۆژنامەنوسان هێزە ئەمنییەكان شێوازی تۆقاندن و زەبروزەنگ بەكار دەهێنن و مافی مرۆڤ پێشێل دەكەن. زەبروزەنگ و تۆقاندن ناكۆكن لەگەڵ دیموكراسیەت و مافی مرۆڤ كە حكومەتی هەرێم بانگەشەی بۆ دەكات".
بەردەوامیی ئەو دۆخەی بادینان لە كاتێكدایە زیاتر لە دوومانگە بەدەل بەرواری مامۆستاو چالاكوان دەستگیركراوە‌و زیاتر لە دوو هەفتەشە چارەنووسی ڕۆژنامەنووس‌و شێروان شێروانی دیارنییە كە لە ماڵەكەی لە هەولێر دەستگیركرا.
بەپێی ڕاپۆرتێك كە پێشتر پەرەگراف بڵاوی كردەوە، تەنیا لە ماوەی یەك هەفتەدا لە دوای ناوەڕاستی مانگی ئابەوە، لە بادینان نزیكەی 100 كەس دەستگیر كراون.
ئەو بارودۆخەی لە دهۆك گوزەرا، گەنجانی شارەكە بە ڕەشبگیری ناویان برد، چونكە وەك ئەوان دەڵێن؛ بە بێ فەرمانی دادوەر هەڵدەكوتنە سەر خەڵك.
بەپێی بەدواداچونەكانی پەرەگراف، هێزە ئەمنییەكانی دهۆك، بە ڕێگەی عەشایەری و هەڕەشەی ڕاستەوخۆ و ناڕاستەوخۆ، هەوڵی بێدەنگكردنی چالاكوان و خەڵكانی ناڕازیی دەدەن، بەتایبەت ئەوانەی لە تۆڕە كۆمەڵایەتییەكاندا ڕەخنە دەگرن یان بانگەوازی خۆپیشاندان دەكەن.
دەڤەری بادینان، لە مێژوی حوكمڕانی كوردیدا بەردەوام لە قازانجی پارتیدا یەكلابۆتەوە، پێش چەندین ساڵ یەكێتی و دواتریش یەكگرتوو، دوو ڕكابەری لاوازی ئەو حیزبە بوون، بەبێ زیادبون و هەڵكشان لە دەنگ‌و سەنگیاندا.