پەرەگراف
پێچەوانەی لێدوانی وەزیری سامانە سروشتییەكان كە فرۆشتنی هەر بڕە نەوتێكی بە قاچاخ ڕەت كردەوە، هۆشیار زێباری دان بە فرۆشتنی نەوت بەقاچاخ دەنێت، بەڵام دەڵێت "سنووردارە".
لە دیدارێكی تەلەفزیۆنیدا لەگەڵ كەناڵی سكای نیوز عەرەبی، هۆشیار زێباری، ئەندامی دەستەی كارگێڕیی مەكتەبی سیاسیی پارتی، لە وەڵامی پرسیارێكدا دەربارەی قاچاخچێتی بە نەوتەوە، وتی "ئێمە ناڵێین قاچاخچێتی بوونی نییە، بەڵام سنووردارە".
ئەم قسەی هۆشیار زێباری لەكاتێكدایە كە ئێوارەی 04-06-2025، كەمال محەمەد، وەزیری سامانە سروشتییەكان بە وەكالەت، لە گفتوگۆیەكدا لەگەڵ كوردستان24 ڕایگەیاند "هیچ بڕە نەوتێكمان بە تانكەر هەناردەی دەرەوە نەكردووە و بە قاچاخ نەمانفرۆشتووە".
وەزیری سامانە سروشتییەكان وتیشی "ڕۆژانە جووڵە بە نەوت دەكرێت لە ناوخۆدا بۆ پاڵاوگەكان، خەڵك ئەو تانكەرانە دەبینێت، وا تێدەگات ئەو نەوتە دەچێتە دەرەوە".
ڕۆژی 05-06-2025یش وەزارەتی نەوتی عێراق ڕایگەیاند، بەدواداچوون بۆ ئەو زانیارییانە دەكات كە ئاماژە بە "بەردەوامبوونی بەقاچاخبردنی نەوت لە هەرێمەوە بۆ دەرەوەی عێراق دەكەن". وتیشی "بەرپرسیارێتی دەكەوێتە ئەستۆی حكومەتی هەرێم و گرتنەبەری هەموو ڕێوشوێنێكی یاسایی لەو بارەیەوە بە مافی خۆمان دەزانین".
لە وەڵامیشدا وەزارەتی سامانە سروشتییەکانی هەرێم وتی "تۆمەتبارکردنمان بە قاچاخچێتیی نەوت، بۆ پەردەپۆشکردنی کارەکانی خۆتانە و ئێوە نەوتی خەڵکی دیکە بە ناوی نەوتی عێراقەوە دەفرۆشن".