دەستەی مافی مرۆڤ: پێویستە تەقەکەرانی گردبوونەوەکەی بەردەم کۆمپانیای لاناز بدرێنە دادگا
دەستەی سەربەخۆی مافی مرۆڤ ئیدانەی بەكارهێنانی چەك و توندوتیژی لە گردبوونەوەكەی بەردەم پاڵاوگەی لانازدا دەكات و دەڵێت "پێویستە تەقەكەران و تۆمەتباران بەزوویی بدۆزرێنەوە و بدرێنە دادگا".
ئەمڕۆ یەكشەممە 30-11-2025، تیمێكی دەستەكە بۆ بەدواداچوونی كەیسەكە چوونەتە شوێنی ڕووداوەكە و لەگەڵ چەند هاووڵاتییەكی مەدەنی گفتوگۆیان كردووە. دواتریش لەگەڵا هەریەك لە پارێزگاری هەولێر و بەڕێوەبەری ئاسایشی هەولێر كۆبوونەتەوە.
دەستەكە دەڵێت "بۆمان دەركەوت كە لێكۆڵینەوە بەردەوامە و بەڵگەكان كۆكراونەتەوە بۆ دۆزینەوەی ئەو كەسانەی تەقەیان كردووە. ئاماژەیان بەوە داوە هەر كەسێك تەقەی كردبێ، ڕێكاری یاسایی بەرامبەر ئەنجام دەدرێ".
دەستەی سەربەخۆی مافی مرۆڤ لە هەرێمی كوردستان، دڵنیایی دەدات كە بەردەوام دەبێت لە چاودێریكردنی ئەم كەیسە و دەرەنجامی لێكۆڵینەوەكان.
وێنەى تیمى دەستەى مافى مرۆڤ لە شوێنى ڕووداوەکە
دوێنێ 29-11-2025، لە گردبوونەوەی دانیشتووانی گوندی لاجان لەبەردەم پاڵاوگەی نەوتی لاناز، لە قەزای خەبات سەر بە پارێزگای هەولێر، گرژی و پێكدادان دروست بوو، بەهۆیەوە بەلای كەمەمەوە كەسێك كوژرا و ژمارەیەكی دیكەش بریندار بوون.
وەزارەتی ناوخۆی حكومەتی هەرێم خۆپیشاندنەكەی بە "ئاژاوەگێڕی بە دەستی دەرەكی و فیتی ناوخۆیی" ناو برد. كوژرانی ئەو كەسەیشی دایە پاڵ خۆپیشاندەران و دەڵێت "لە ئەنجامی تەقەی ئەو كەسانەدا هاووڵاتییەك بووە قوربانی و گیانی لەدەست دا".
ئەو كەسەی كە كوژراوە، پیاوێكی تەمەن 25 ساڵی خەڵكی كەركووكە و شۆفێری بارهەڵگر بووە. ئەمڕۆ كەسوكارەكەی ڕایانگەیاند كە "هیچ پەیوەندییەكی بە خۆپیشاندانەكەوە نەبووە. بە بارهەڵگرەكەیەوە لەو ڕێگەیەوە تێپەڕیوە، بەڵام بەهۆی خۆپیشاندانەكەوە ڕێگای لێ گیراوە".
پێچەوانەی ڕاگەیەندراوەكەی وەزارەتی ناوخۆ، باوكی كوژراوەكە وتی "كوڕەكەم بە تەقەی ئاسایشی پاڵاوگەی لاناز و بە فیشەكی دۆشكە كوژراوە".
دانیشتووانی گوندی لاجان كە دەكەوێتە نزیك پاڵاوگەی لاناز لە قەزای خەبات لەسەر ڕێگای گوێڕ، چەند ڕۆژێكە خۆپیشاندان دەكەن و پێشتریش چەند جارێك خۆپیشاندانیان ئەنجام داوە. داوا دەكەن گەنجەكانیان لە پاڵاوگەكەدا دەرفەتی كاریان بۆ بڕەخسێنرێت.
پاش ئەوەی دوێنێش خۆپیشاندانەكە بەردەوام بوو، گرژى دروست بوو و هێزە ئەمنییەكان و پاسەوانانی پاڵاوگەكە لە دەروازەی پاڵاوگەكەدا بە دەستڕێژی گوللـە هەوڵی كۆتاییهێنان بە خۆپیشاندانەكەیان دا، لە ئەجامدا گەنجێك كوژرا كە خۆپیشاندەران وتیان "بە تەقەی ئاسایشی پاڵاوگەكە" گیانی لەدەست داوە.
دانیشتووانی گوندی لاجان سەر بە عەشیرەتی هەركین. ئەوان دەڵێن "بەر لە هەڵبژاردن بەڵێنیان پێ داین كە دەرفەتی كار بۆ ئێمەش فەراهەم بكرێت، بەڵام ئێستا پاشگەز بوونەتەوە". هەر بۆیە ڕێگەی هاتووچۆی تانكەرەكانیان بەرەو هەولێر داخست.
باوکى گەنجە کوژراوەکە لە کۆنگرەیەکى ڕۆژنامەوانیدا گلەیى ئەوەى کرد کە "تا ئێستا نوێنەرێکى حکومەتى هەرێم نەهاتووە سەرەخۆشییەکەم لێ بکات، تەنانەت تەلەفۆنێکیشیان بۆ نەکردووم". داواى لە دامودەزگا پەیوەندیدارەکانى حکومەتى هەرێميش کرد کە "خوێنى کوڕەکەم بەهەدەر نەچێت" و بکوژ دەستگیر بکرێت کە وەکوو خۆى دەڵێت "دەناسرێتەوە".
هاوسەرى کوژراوەکەش بە کۆرپەکەى باوەشیەوە لە پرسەى مێردەکەیدا قسەى بۆ میدیاکان کرد و وتى "نە دەمانچەى پێ بوو نە هیچ. لە تەنیشت سەیارەکەى خۆیەوە وەستابوو بۆ ئەوەى خۆپیشاندانەکە تەاو ببێت و بگەڕێتەوە. کاسبکارى ئەو ڕێگایە بوو، بۆ پەیداکردنى ١٥ هەزار دینار ڕۆیشتبوو".
وەزارەتی ناوخۆى حکومەتى هەرێمى کوردستان لەبارەى خۆپیشاندانەکەوە دەڵێت "چیتر ڕێگە نادەین سوود لە نیازپاكیی دامودەزگاكانی هەرێمی كوردستان وەربگێرێت و سنوورێك بۆ ئەو كارە تێكدەرانە دادەندرێت. بۆ ڕاگرتنی ئەو جۆرە ئاژاوەگێڕییانە، بەپێی یاسا بەركارەكان لە هەرێمی كوردستان مامەڵە لەگەڵ كەسانی ئاژاوەگێڕ دەكرێت و كەس لە سەرووی یاسا نییە".