پەرەگراف
بزوتنەوەی گۆڕان لە ژێردروشمی (گۆڕان بەرەو قۆناغێکی نوێ بۆ ڕوبەڕوبونەوەی ئاڵنگارییەکان) سبەینێ لە گردی زەرگەتەی شاری سلێمانی دووهەمین کۆنفرانسی نیشتیمانی خۆی گرێدەدات و دوو ڕۆژ دەخایەنێت.
چۆمان محەمەد وتەبێژی کۆنفرانسەکە بە میدیای گۆڕانی وت، لە کۆنفرانسەکەدا لە پێنج ڕاپۆرتدا بە وردی پێداچونەوە بۆ هەیکەلییەت و دۆخی بزوتنەوەکە دەکرێت.
"دەمانەوێت بۆ شێوازی سیاسەتکردن بچنە قۆناغێکی نوێوە و هەڵسەنگاندن بۆ بڕیارەکانی جڤاتی نیشتمانی و ڕابردوی نوێنەرەکانی بزوتنەوەی گۆڕان بکەین" وتەبێژی دووهەمین کۆنفرانسی گۆڕان وادەڵێت.
دەشڵێت، ئامانجیانە لەو کۆنفڕانسەدا بگەن بەو وەڵامەی ئایا بەرنامە سیاسییەکەیان پێویستی بە گۆڕانکارییە یاخود نا، بەهەمو ئیرادەیانەوە هەوڵدەدەن بۆ تێپەڕاندنی ئەو گرەو و ئاڵەنگارییانەی لەسەر بزوتنەوەی گۆڕان دەکرێن.
بەپێى دەستورى رێکخراوەیى بزوتنەوەى گۆڕان، ئەرکەکانى کۆنفڕانسى نیشتمانى خۆى دەبینێتەوە لە نوێکردنەوەى بەرنامەى سیاسى لەبوارە جیاوازەکاندا، پێداچونەوە بە دەستورى رێکخراوەیى، هەڵسەنگاندن و دەستکاریکردنى پلاتفۆرمەکانى هەڵبژاردنەکانى پارێزگا وهەرێم و عێراقى فیدراڵ، هاوکات هەڵسەنگاندنى ئەداى تیمەکانى بزوتنەوەى گۆڕان لە حکومەت و نوێنەرەکانى لە دەزگا هەڵبژێردراوەکانى؛ پارێزگا، هەرێم و عێراقى فیدراڵ، هاوکات هەڵسەنگاندنى ئەداى جڤاتى نیشتمانى لە چەند ساڵى رابردودا.
کۆنفرانسەکەی گۆڕان پڕۆسەى سەرلەنوێ خۆڕیکخستنەوە و خۆنوێکردنەوەى بزوتنەوەکەیە بەتایبەت دواى ئەنجامى هەڵبژاردنى ئەنجومەنى نوێنەرانى عێراق لە ئۆکتۆبەری 2021 کە بزوتنەوەى گۆڕان شکستی هێناو هیچ کورسییەکی نەبردەوە.
هەر لە چوارچێوەی خۆڕێکخستنەوەدا، ناوەڕاستی مانگی ڕابردوو ژووری هەڵبژاردنی گۆڕان دەرگای خۆپاڵاوتنی کردەوە بۆ هەڵبژاردنی ڕێكخەری گشتی و ئەندامانی خانەی ڕاپەڕاندن، بەڵام هێشتا پڕۆسەکە ئەنجام نەدراوەو بە هەڵواسراویی ماوەتەوە.
خانەی ڕاپەڕاندنی گۆڕان باڵاترین دامەزراوەی جێبەجێكردنی بزووتنەوەكەیە و لە ڕێكخەری گشتی و شەش ئەندامی دیكە پێك دێت. دوای شكستی گۆڕان لە ھەڵبژاردنەکەی ٢٠٢١، ڕێكخەری گشتی و خانەی ڕاپەڕاندن دەستلەكاركێشانەوەی بەكۆمەڵیان ڕاگەیاند، بەڵام بزووتنەوەكە نەیتوانی شوێنەكانیان پڕ بكاتەوە و بەشێكیان لە پۆستەكانیان مانەوە.
بەپێی دەستووری ناوخۆیی بزووتنەوەی گۆڕان، ڕێكخەری گشتی و ئەندامانی خانەی ڕاپەڕاندن، جگە لە سەرۆكی جڤاتی گشتیی بزووتنەكە كە ئەندامی خانەیە و لە جڤاتی گشتی هەڵدەبژێردرێت، ئەوانی دیكە سەرجەمیان لە كۆبوونەوەی جڤاتی نیشتمانیدا بە دەنگدانی نهێنی و ڕاستەوخۆ و زۆرینەی سادە پەسەند دەكرێن.
هەر بەپێی دەستووری ناوخۆیی گۆڕان، هەڵبژاردنی ڕێكخەری گشتی و ئەندامانی خانەی ڕاپەڕاندن، دوو ساڵ جارێك دەبێ و تەنها بۆ سێ خول بۆیان هەیە خۆیان بۆ هەمان پۆست كاندید بكەنەوە.
گرێدانی کۆنفرانس و هەڵبژاردن بۆ باڵاترین پۆستەكانی ناوخۆی گۆڕان لە كاتێكدایە هەرێمی كوردستان لەبەردەم هەڵبژاردنی پەرلەمانی كوردستاندایە، ئەو كێشانەی بەرۆكی گۆڕانیان گرتووە و لە دوای مەرگی نەوشیروان مستەفاوە بوون بەهۆی جیابوونەوەی چەندین كەسایەتی و گرووپ لە بزووتنەوەكە، هێشتا وەك خۆیانن.
هەرچەندە گۆڕان چەندین جار بانگەوازی بۆ ئاشتەوایی ناوخۆیی و كاری پێكەوەیی بۆ هەستانەوە كردووە، بەڵام بانگەوازەكان بێكاریگەر و كێشەكان بێچارەسەر ماونەتەوە. ناڕازییەكان ئامادە نین بگەڕێنەوە ناو بزووتنەوەكە و بەرپرسانی گۆڕان تۆمەتبار دەكەن بەوەی خەمساردن لە ئاست جێبەجێكردنی داواكانی ئەوان و پڕۆسەی هەستانەوەی گۆڕان.
دیارترین پرۆژەی ناڕازییەكان بۆ هەستانەوەی گۆڕان، پرۆژەكەی عوسمانی حاجی مەحموود و هاوڕێكانی بوو كە لەژێر ناوی "چەند بنەمایەك بۆ ساغكردنەوە و ڕێكخستنەوە و هەستانەوەی بزووتنەوەی گۆڕان"، پێشكەشی بزووتنەوەكەی كرد.
"ساغكردنەوەی ناسنامە و ڕاستكردنەوەی گوتاری سیاسیی بزووتنەوەكە، یەكلاییكردنەوە و ڕێكخستنەوەی پەیوەندیی گۆڕان و كۆمپانیای وشە، كشانەوەی گۆڕان لە حكومەت، ڕۆڵی كوڕانی نەوشیروان مستەفا لە بزووتەوەكەدا بەپێی ڕێكارە حیزبییەكان، لێپرسینەوە لەوانەی كە لە گەندەڵی تێوەگلاون، ڕۆڵبینینی گۆڕان وەكوو ئۆپۆزسیۆنێكی بوێر و چالاك"، ئەمانە لە گرنگرترین خاڵەكانی پرۆژە 17 خاڵییەكەی عوسمانی حاجی مەحموود بوون.
سەرچاوەیەكی باڵا كە بە وردی ئاگاداری گفتوگۆی نێوان گۆڕان و عوسمانی حاجی مەحموود و هاوڕێكانی بوو، پێشتر بە پەرەگرافی وت "ئەو پرۆژەیەش وەك سەرجەم هەوڵەكانی دیكە بۆ ئاشتەوایی ناوخۆیی و گەڕانەوەی ناڕازییەكان شكستی هێنا و گفتوگۆكان بە یەكجاری كۆتاییان هات".
لەبارەی هۆكاری شكستهێنانی، ئەو سەرچاوەیە وتی "دوو پرسی سەرەكی هەن كە گۆڕان ئامادە نییە هیچ هەنگاوێكیان لەبارەوە بنێت و یەكلاییان بكاتەوە، یەكەمیان پەیوەندیی بە كوڕەكانی كاك نەوشیروانەوە هەیە، هەر لە ڕۆڵ و پێگەی سیاسی و خاوەن بڕیارییان لەناو گۆڕان و پەیوەندیی داراییان لەگەڵ بزووتنەوەكە، بەتایبەت خاوەنداریی گردی زەرگەتە و كۆمپانیای وشە، دووەمیان پەیوەندیی بە هەڵوێستی سیاسی گۆڕانەوە هەیە بە كشانەوەی لە حكومەت و بوونەوە بە ئۆپۆزسیۆنێكی جددی و كاریگەر".