پەرەگراف
قوباد تاڵەبانی دەڵێت "بە دەستێكی پۆڵایین ڕووبەڕووی هەموو لەیاسادەرچوویەك دەبینەوە و ئەو دەستانە لەناو دەبەین كە سەرانە لە وەبەرهێنەرانمان بەتایبەتی و هاووڵاتیانمان بەگشتی وەردەگرن". جەختیش دەكاتەوە كە "ستراتیژمان بەهێزكردنی كەرتی تایبەتە".
قوباد تاڵەبانی، جێگری سەرۆكی حكومەتی هەرێم، ئەمڕۆ سەردانی ژووری بازرگانیی پارێزگای سلێمانیی كرد و پشتگیری بۆ دووپات كردنەوە و ڕایگەیاند "چیتر بە هیچ شێوەیەك ڕێگە نادەین هیچ كەس و لایەنێك لە ڕێگەی سەرانەوەرگرتن یان هەر هەوڵێكی هاوشێوەی دیكە، كێشە و گرفت بۆ وەبەرهێنەر و بازرگانان دروست بكات".
قوباد تاڵەبانی وتیشی "ستراتیژی ئێمە بەهێزكردنی كەرتی تایبەتە، هەر بۆیە بە هەموو تواناوە پشتگیریی بازرگان و وەبەرهێنەران دەكەین، لایەنە پەیوەندیدارەكانی حكومەت ڕاسپێردراون هەموو جۆرە كارئاسانییەك بكەن لەپێناو كەمكردنەوەی ڕۆتین لەبەردەم كارەكانیان".
یەكێتی حیزبی حوكمڕانە لە سلێمانی و لە ماوەی ڕابردوودا چەندین جار ڕووبەڕووی ڕەخنە بووەتەوە لەسەر پارەسەندن لە سەرمایەداران، لە بەرامبەردا بافڵ تاڵەبانی سەرۆكی ئەو حیزبە چەند جارێك ڕایگەیاندووە، ڕووبەڕووی هەموو ئەوانە دەبێتەوە كە "پارەو سەرانە لە سەرمایەداران دەسەنن" و بە "مافیا" ناوی بردوون، بافڵ تاڵەبانی ڕووبەڕووبوونەوەی ئەو كەسانەی بە ئیشی خۆی ناو بردووە و جەختی لە سەروەریی یاسا كردووەتەوە.
هەفتەی ڕابردوو ماڵ و دیوەخانی بەرپرسێكی سەربازیی یەكێتی بە ناوی "كوێخا دێرین عوزێری" لەلایەن هێزە ئەمنییەكانەوە تەقێندرایەوە و خاپوور كرا، كە تۆمەتبار كرابوو بە "سەرانەوەرگرتن" لە سەرمایەدارێكی شاری سلێمانی و تەقەكردنیش لەو سەرمایەدارە لەلایەن دوو چەكداری سەر بەوەوە.
دواتر ئەكرەم عەبدوڵڵا، سەرۆكی عەشیرەتی سمایل عوزێري، لە كۆنگرەیەكی ڕۆژنامەوانیدا وتی "ئەم كوڕەی ئێمە ئەرك و دەوامی لەناو دەسەڵات و پێگە سەربازییەكاندا بووە و فەرمانی لەوێوە وەرگرتووە، چەك و جبەخانەی ئەوانی پێ بووە و ئەوان ئاگایان لە هەڵسوكەوتەكانی بووە، بەڵام بەداخەوە ئێمەیان كردووە بە واجیهە".