پەرەگراف- سورکێو محەمەد
خەریكە هاوكێشەكە پێچەوانە دەبێتەوە؛ ئەو سلێمانییەی یەكێتیی زۆرجار بە پاساوی هەبونی ئازادیی و کرانەوەو گەشەی مەدەنیەت وەك دەستكەوتێك دەیكردە توانج بۆ پارتی دیموكراتی ركابەری، ئێستا و لە سەردەمی سەرۆكایەتییە حیزبییەكەی بافڵ تاڵەبانی، بەرەو تونێلێكی تاریك پەلكێش دەكرێت.
كوڕە گەورەی جەلال تاڵەبانی، سكرتێری كۆچكردوی یەكێتیی نیشتمانیی كوردستان، وا ساڵ و نیوێكە كوردەواری گوتەنی "مەسولی بەڕ و بەحر"ـی پارێزگاكانی سلێمانی و هەڵەبجەیە، بە هەردوو ئیدارەی گەرمیان و راپەڕینیشەوە، ئەو خۆی بە بەرپرسی هەموو باش و خراپییەكانیی ناوچەكە دەزانێت لە دوای روداوەكانی 8ـی تەمموزی 2021ـەوە، دوای ئەوەی لە كتوپڕێكدا دەستیگرت بەسەر تەواوی یەكێتییدا و لاهور شێخ جەنگی، هاوسەرۆكی حیزبەكەیی و زڕئامۆزای دورخستەوە.
بافڵ تاڵەبانی، كە هەرزوو خۆی وەك تاكە سەرۆكی یەكێتیی وێنا كرد؛ بەڵێنیدا بە رەخساندنی کەشوهەوایەکی ئارام و سەقامگیر، لەڕێی پاراستنی ئازادیی و مافەکانی مرۆڤ، بە دیاریكراوی وتی "لێدان لە سەروەریی یاسا بنەبڕ دەکەین".
ئەو كۆمەڵگە مەدەنییەی بانگەشەی بۆ كرد؛ نەك لە سلێمانی نابینرێت وەك چاودێران باسیدەكەن، بەڵكو لە دەركەوتنەكانی خۆیشیدا ونن؛ بەردەوام بە ستایلێكی سەربازی و لەگەڵ چەكداری زۆر و بە تایبەت دژەتیرۆردا دەردەكەوێت؛ خۆی لە زۆربەی روداوەكاندا لە یەككاتدا رۆڵی سكاڵاكار دەبینێت، دواتر وەك دادوەرێكی دادگا بڕیار دەدات و هەر خۆشی دەبێتە دەسەڵاتی جێبەجێكار و بە هێزەكانی چواردەوری جێبەجێیان دەكات.
ئەو بڕیارانە لە هەڵدانەوەی دۆسیەی دابەشكردنی زەویی لە سلێمانی و هێز ناردنە سەر فەرمانگەی حكومی تێدایە تا دەگاتە دەستتێوەردانی راستەوخۆ لە خۆپیشاندانی خوێندكاران و دەستگیركردنی گەنجان و دواتریش داخستنی یانەشەوانەكان.
تاڵەبانی لە نوێترین هەنگاویدا نیوەشەوی 22ـی 12ـی 2022ـدا پیاسەیەکی بە ناوچەی سەرچناری شاری سلێمانیدا کرد، کە لە دروستبونیەوە شوێنی گەشتوگوزارو کەیف و سەفای خەڵکی شارو ئەو میوانانەبووە لە دەرەوە ڕوویان تێكردووە، ئەو لە جامی ئۆتۆمبێلەكەیەوە بە گرژیی و توڕەییەوە دەرکەوت و "بڕیاریدا سەرجەم ئەو یانە شەوانانەی لەو ناوچەیەدان دابخرێن".
میدیای فەرمیی یەکێتیی دەڵێت بافڵ تاڵەبانی لە سەرچنار "ژینگەی شێوێنراو و دوور لە بەها باڵاکانی کۆمەڵگەی کوردەواریی بینی، بڕیاریدا بە داخستنی هەموو ئەو شوێنانەی دوورن لە ئایین، ئاکار و رەوشتی بەرزی کۆمەڵگەی کوردی".
سەرۆكی یەكێتیی خۆی لەبارەی داخستنی ئەو شوێنانەوە وتی "یەکێتیی پارێزەری مافە کەسیی و تایبەتەکانە، بەڵام ئەوکاتەی سنوورەکان دەبەزێنرێت و رێز لە بەها باڵاکان ناگیرێت، هەڵوێستمان دەبێت".
بافڵ تاڵەبانی لە ئۆتۆمبێلی سکرتێرە ڕۆژنامەوانییەکەیەوە سەیری یانەشەوانەکانی سەرچنار دەکات لەو شەوەدا کە بڕیاری داخستنیانی دا. وێنە؛ میدیای یەکێتی.
لەكاتێكدا بەپێی چەندین یاسای بەركار لە عێراق و هەرێمی كوردستان رێكاری دیاریكراو هەن بۆ لێپرسینەوە و لێكۆڵینەوە تا داخستنی هەر شوێن و جێگایەك ئەگەر بەپێچەوانەی یاساو ئاكاری كۆمەڵگە و رێنماییەكانەوە كاربكەن.
بڕیارەكەی بافڵ تاڵەبانی راستەوخۆ بەسترایەوە بە ئایین و هەرزوو حزب و كەسایەتیی ئیسلامی، لە نێویاندا سەلەفیی، پەرلەمانتار و سۆشیال میدیای بە ئاڕاستەی دەستخۆشی و پیاهەڵداندا خرۆشاند، كە ئەوەش بوو بە بابەتی سەرەكی و هەواڵیی چەند رۆژی هەموو میدیای یەكێتیی.
لە نێو پەرلەمانتارە ناسراوەكاندا عەلی حەمە ساڵح و لە نێو ئاینییەكانیشدا كەسانی وەك حاجی كاروان و دواتر عەبدولـلەتیف ئەحمەد، كەسایەتیی دیاری سەلەفییەكانی سلێمانی هەبوون كە هەم خۆی پەیوەندی لەگەڵ سەرۆكی یەكێتیی باشە و برایەكیشی پەرلەمانتاری یەكێتییە لە بەغداد، بەدوای ئەوانیشدا مامۆستای ئاینی، رۆژنامەنوسی حیزبی و كەسایەتیی ئیسلامی زۆر بوون کە پەیامی دەستخۆشییان نارد.
بەپێی بەدواداچونی پەرەگراف، زۆرێك لەو كەسانەی دەستخۆشییان لە بڕیارە حزبیی و كەسییەكەی بافڵ تاڵەبانی كرد، پێشتر لەو زۆرینەیەدا بون كە ساڵانێكە بانگەشەی هێنانەدی كۆمەڵگەیەكی مەدەنی دەكەن و بە دروشمەكانیان هەوڵ بۆ سەروەری یاسا و دورخستنەوەی دەستی حزب لە حكومەت دەدەن، بەڵام لە ئاستی بڕیارەكەی سەرۆكی یەكێتیی رەخنەیان نەگرت بۆچی بەبێ بڕیاری دادگا و حكومەت و رەچاونەكردنی مافەكانی مرۆڤ و ئازادی، هێزی چەكدار دەنێرێتەسەر یانەشەوانەکان.
ئەوە یەكەم بڕیاری كەسی و حیزبی سەرۆكی یەكێتیی نییە؛ فەرمانبەری حكومی دەستگیركردووە، هێزی ناردووەتەسەر شارەوانی، خوێندكار لەناو ماڵەكەی خۆیدا و خۆپیشاندەریش دەستگیركران و لە سەرمایەداری پرسییەوە؛ ئەوەش ئەو وێنەیەیە کە پێشتر وەسفی ناوچەی ژێر دەستی پارتیی پێدەكرا و لەگەڵئەوەشدا؛ مەترسی هەیە كاریگەرییەكانی بە ترس و نائارامیی زیاتر بۆ شاری سلێمانی بشكێتەوە.
دەسەڵات و بەرەی ئیسلامی لە کوردستان
سەلەفی و ئیسلامییەکان بڕیارەکەی بافڵ تاڵەبانی-ـیان قۆستەوە و وایان پیشاندا؛ ڕەوت و ئاڕاستەکەیان بەهێزەو ئەو بیركردنەوەیەش بە چالاكیی و ئامادەیی زۆرەوە لە تۆڕە كۆمەڵایەتییەكاندا هەیە و بە نووسین بەردەوام شەڕی پێدەكەن، هەر لە دروستكردنی تۆمەت بۆ ئەوانەی جیاواز بیردەكەنەوە تا تەخوین و ناساندنیان بە دژە ئایین.
داخستنی یانەكانی سەرچنار هاوكات بوو لەگەڵ بەردەوامی ئەو هەڵمەتە ئاینییەی بۆ دژایەتی نوسەر و چالاكوانان و ژمارەیەك لە كەسایەتی ڕۆشنبیری سلێمانی هەیە؛ بە پاساوی داكۆكیی لە مافەكانی ژنان و پرسی جێندەر، بۆیە "توندڕەوی" ئیسلامی لەناو سۆشیال میدیا، لە پەیامەکانیانەوە دەردەکەوێت کە پێیانوایە هێزیان لە سەرۆكی یەكێتییەوە وەرگرتووە.
لە دوای ئەو بڕیارەوە و بەپێی بەدواداچونی پەرەگراف بۆ كاردانەوەی خەڵك، بە تایبەت لە سۆشیال میدیا؛ خەریكە دەبێتە هەڵمەتێك بۆ داواكردنی هەنگاوی زیاتر وەك نەهێشتنی ئاهەنگی یەكترناسین لە زانكۆ و پەیمانگەکان، قەدەغەکردنی دانیشتن و خواردنەوەی کهولیی ئێوارانی ئەزمڕ و گۆیژە، ڕێگەنەدان فرۆشتنی ئاشكرای ماددە كهولییەكان تا جیاكردنەوەی هەردوو ڕەگەز لە ناوەندەكانی خوێندن کە ئەمەی دواییان هەندێک وەک توانج بەکاری دەهێنن.
بەوتەی چاودێران کۆمەڵگەی کوردی بە درێژایی مێژوو کێشەی دینیی نەبووە، پێکەوەژیان و ئاشتی کۆمەڵایەتیی یەکێک لە سیما دیارەکانی بووە، بەڵام لەم ساڵانەی دواییدا ماوە ماوە پرسی کۆمەڵایەتی گرێدراو بە ئایین دەبێتە باسی گەرمی میدیاو تۆڕە کۆمەڵایەتییەکان، بەوهۆیەوە خەڵک بەسەر دوو ئاڕاستەی لەگەڵ یان دژدا، دابەشدەکات.
دوو ڕۆژ بەرلە بڕیارەکەی بافڵ تاڵەبانی بۆ داخستنی یانەشەوانەکان، بڵاوبوونەوەی پەیامێك بە دەنگی كچێك بۆ پاڵپشتی لە مافەكانی ژنان بە بڵندگۆ لە چەند شارێکی کوردستان، لە چوارچێوەی چالاکییەکی مەدەنیدا کە نووسینگەی قوباد تاڵەبانی برای بافڵ تاڵەبانی و جێگری سەرۆکوەزیران پاڵپشتیی دەکرد مشتومڕێکی زۆری بەدوای خۆیدا هێنا.
لە چەند ناوچەیەک ڕێگریى لە بڵاوکردنەوەی ئەو پەیامە کراو سکاڵای لە دژ تۆمار کرا، بڵاوکردنەوەى پەیامەکە بە بڵدنگۆ لەسەر بینای شارەوانیی هەڵەبجە، کاردانەوەى بەدوادا هات و سەرۆكی شارەوانی ڕایگەیاند كە بایكۆتی دەوام دەكات، بەڵام دواتر پەشیمان بووەوەو پارێزگاری هەڵەبجە وتی "ئەو پەیامە باسی ئازادی و یەكسانیی كردووە كە ئایینی ئیسلامیش پشتگیریی دەكات".
ئەو پەیامەی لە بڵندگۆكانەوە بڵاو كرایەوە، چالاكییەكی مەدەنی و خوێندنەوەی تێكستێك بوو بۆ پشتیوانی لە مافەكانی ژنان كە لە بەشی كۆتاییدا دەڵێت: من دەنگی نەبیستراوی مێینەم.
ئیسلامییەکان هێرشێکی فراوانی ڕێکخراویان کردەسەر ئەو چالاکییە، وەک درێژکراوەی هێرشی چەند ڕۆژی پێشووتریان بۆسەر مەریوان وریا قانع، نووسەرو چۆمان هەردی، چالاکوانی مافەکانی ژنان، ئەوەش بەهۆی نووسین و چالاکییەکانیان لەسەر پرسی ماف و ئازادییەکان و جێندەر.
پێشتریش هەر لە چوارچێوەی ئەو تەوژمە ئیسلامییەدا رێگە نەدرا لە زانكۆی هەڵەبجە و چەندین شوێنی دیكە كۆرس و سیمینار و گفتوگۆ لەسەر بابەتی پەیوەست بە ماف و ئازادییەكان لە نێویاندا جێندەر بكرێت.
ڕووکردنە ئیسلامییەکان لەلایەن بافڵ تاڵەبانییەوە ڕوون نییە بە چ ئامانجێکە، پەرەگراف لە سەرچاوەیەکی ئاگادارەوە زانیویەتی پەیوەندییەکە بە جۆرێکە "یەکێتی مانگانە هاوکاری دارایی کۆمەڵی دادگەری دەکات"، کە یەکێک لە لایەنە دیارەکانی ئەو تەوژمەی ئیسلامییەکانە بەتایبەت لە تۆڕەکۆمەڵایەتییەکان.
عەلی باپیر سەرۆکی کۆمەڵ ئەو هاوکارییە نایشارێتەوەو پێشتر لە وەڵامی پرسیاری پارە وەرگرتن لە یەکێتی، وتی "ئێمە ئەگەر یەکێتی، ئەگەر پارتی، ئەگەر هەر لایەنێکی دیکە بەبێ بەرامبەر هاوکارییەکمان بکات سوپاسی دەکەین و بە حەقی خۆشمانی دەزانین".
بڕیارەكانی سەرۆكی یەكێتیی بە دڵی ئیسلامییەكان لە كاتێكدایە قوباد تاڵەبانی، برای بافڵ تاڵەبانی و جێگری سەرۆكی حكومەت، بەشی تایبەت بە جێندەر لە نوسینگەكەی هەیە و خۆی بە بەرگریكار لە مافەكانی ژنان و ئازادی دەزانێت، بەڵام لەو هەڵمەتە توندڕەوییەی هەیە تائێستا بێدەنگە.
چاودێرانی ڕەوتی ئیسلامی پێیانوایە، دەسەڵات لە کوردستان لە پاڵ حیزبە ئیسلامییەکاندا، بە مەبەست بایەخیش بە سەلەفییەکان دەدات و یەکێک لە هۆکارە سەرەکییەکانیش ئەوەیە؛ سەلەفییەکان حیزبایەتی و بەشداریی لە هەڵبژاردن ناکەن، دژی دەسەڵات ناوەستنەوەو هیچ جۆرە فشارو ناڕەزایی دەربڕینێکیان نییە وەک خۆپیشاندان و گردبوونەوە، بایەخپێدان و هاوکاریی و موجامەلەی دەسەڵات گەشەی بەرچاوی سەلەفییەکانی بەدوای خۆیدا هێناوە.
پێشوازیی بافڵ تاڵەبانی لە عەبدولـلەتیف سەلەفی لە ماڵەکەی خۆی لە دەباشان، ٥-١٠-٢٠٢١. وێنە؛ پەیجی بافڵ تاڵەبانی.
شێرکۆ کرمانج، نووسەر و توێژەر پێیوایە، ئیسلامیزم و سەلەفیزم و داعشیزم، لە ژینگەی ئازاددا گەشە ناکەن، دەڵێت "ئەوەی بۆتە ھۆکاری گەشەی ئەم سێ خەتە کۆنەپارێز و توندڕەوە مۆنۆپۆلی ئازادییە لەلایەن ئەم ڕەوتانەوە. بەواتایەکی دیکە، دەرگا و فەزای ئازادی بەڕووی ڕەوتە لیبرال و یەکسانخواز و ئازادیخواز و نوێخواز و فرەییخوازەکان داخراوە، لە بەرابەردا بۆ سەلەفی و کۆنەپارێز و توندڕەوەکانیش فەرشی سوور ڕاخراوە".
"پارتی و یەکێتیی ئازادیخوازان وەدەردەنێن و کۆنەپارێزان لە باوەش دەگرن. ڕاستیی ئەم ئارگیومێنتەی ئێمە لە سەرھەڵدان و ئاشکرابوونی ئەو ھەموو جوڵە و خانە نووستوو و بەخەبەرەی داعش دەردەکەوێت لەگەڵ ئەو ھەموو ڕێگرییکردنە لە ڕای ئازاد لە زانکۆکانی ھەرێم" شێرکۆ کرمانج وادەڵێت.
ئەو نووسەرە ئەوەشدەخاتەڕوو، کۆمەڵگەی کوردی پێویستی بە کرانەوەیەکە "ئازادیخواز و لیبرالێک وەک سەلەفی و ئیسلامییەک یەکسانانە ئازاد بن لە ڕا دەربڕین، نەک یەکێکیان بەناوی خوا و بەناوی ئەخلاق و بەناوی کۆمەڵگە ڕێگە لە ئازادییەکانی ئەوانی دیکە بگرێت".
ڕەوتی سەلەفی لە ساڵانی 1980ـەوە لە کوردستان سەریهەڵداوە، دیارترین کەسایەتییەکانی حەمدی سەلەفی، لە دهۆک و عومەر چنگیانی، لە سلێمانی بوون کە دواتر هەردووکیان بوون بە پارتی، ئێستاش عەبدولـلەتیف سەلەفی دیارترین کەسایەتییانە لە سلێمانی.
هەرچەندە ئەو جۆرە سەلەفییەی ئێستا لە کوردستان بە ئاشکرا هەیە سەلەفی جیهادی نییە کە باوەڕی بە شەڕی چەکداریی دژی دەسەڵات هەبێت، بەڵام توێژەران پێیانوایە لەناو ئەوانەدا ڕەنگە کەسانێک هەبن، کە ئەگەر هەلومەرجیان بۆ بڕەخسێت ئاسان باوەڕیان دەگۆڕێت و دەست دەدەنە چەک.
سەلەفی چەکداری لە ساڵانی نەوەدەکانی سەدەی ڕابردوو لە کوردستان گەشەی کرد و لە کۆتاییەکانی ئەو دەیەیەدا، لە ناوچەکانی هەورامان باڵادەست بوون لەژێر ناوی ئه‌نسارئیسلام و جوندلئیسلام، کە دژی حکومەتی هەرێم وەستانەوەو بە تیرۆریست ناسێندران، شەڕی چەکداریی خوێناوی لەنێوان ئەوان و هێزەکانی پێشمەرگەی یەکێتی سەریهەڵدا.
سەرهەڵدانی داعش و پەلاماردانی چەند ناوچەیەکی هەرێم و شەڕی خوێناویی لەگەڵ هێزەکانی پێشمەرگە لە 2014-2017؛ شانە نووستووەکانی سەلەفی جیهادیی لە کوردستان بوژاندەوە و چەندین کەس ڕوویانکردە ناو داعش، ژمارەیەکی زۆریش لەلایەن هێزە ئەمنییەکانەوە دەستگیرکران.
دواینجار 21ـی ئەم مانگە دەزگای ئاسایش، ئاشكراكردنی "ئەمارەتێكی تیرۆریستانی داعش"ـی لەلایەن ئاسایشی سلێمانییەوە ڕاگەیاند و دەڵێت "ئەمیر و تەواوی ڕێكخەرەكان و ئەندامەكان"ـی دەستگیركراون، كە 54 "تیرۆریستن" و سێ "تیرۆریستیش" كوژراون.
دەزگای ئاسایشی هەرێم، پێنج پلانی گرووپەكە دەخاتەڕو كە خۆی دەبینێتەوە لە؛ دروستكردنی حەشارگە و سەربازگەیەك لە سنوری سلێمانی، دروستكردنی ئەمارەتی داعش لە گرتووخانەی چاكسازی گەورانی سلێمانی، هەڵهاتنی ژمارەیەك چەكداری داعش لە ڕێگای هەرێمی كوردستانەوە، ڕۆیشتنی چەند "تیرۆریستێك" لەناو شارەكانی هەرێمەوە بۆ حەمرین و دروستكردنی حەشارگە لەناوچەی سەنگاو.
لەسەر گەشەی "توندڕەوی" ئیسلامی و هێرشەكانی سۆشیال میدیا دژی ئەوانەی بە پێچەوانەی رەوتی حزب و كەسایەتییە ئیسلامییەكانەوە بیردەكەنەوە؛ هەر لەم مانگەدا زیاتر لە 150 كەسایەتیی و رۆشنبیر و رۆژنامەنوس بە پەیامێك هۆشدارییان بە لێپرسراوانی یەكێتیی، حكومەت، حزب و رایگشتی راگەیاند، بەڵام نە وەڵامیان وەرگرت و نە یەكێتیی و سەرۆكەكەی هیچ گرنگییەكیان پێدا.
تاڵەبانی و گواستنەوەی ئەزموونی بادینان بۆ سلێمانی
بافڵ تاڵەبانی هەرچەندە لە ڕاگەیاندنەکانەوە ڕەخنە لە سیاسەتی پارتی دەگرێت، بەتایبەت لە پرسی ماف و ئازادییەکان و دۆسیەی ڕۆژنامەنووس و چالاکانی بادینان، بەڵام خواستی ئەوەی هەیە ئەزموونی پارتی لە بادینان بگوازێتەوە بۆ سلێمانی و لە چەندین کۆبوونەوەی ناوخۆیی حیزبەکەیدا ئاماژەی بەوە کردووە، وەك چاودێرانیش لە بارودۆخی ئێستای سلێمانیدا هەمان نییەت بەدیدەكەن.
سەرچاوەیەك دەڵێت "کاک بافڵ وتی بۆ پارتی بتوانێت ئەوە بکات بۆ من نەتوانم"، وەک ئاماژەیەک بۆ کۆنتڕۆڵی تەواوەتی بەسەر ئەم ناوچەیە و مەرکەزییەتێکی بەهێز، هاوشێوەی مەسعود بارزانی لە زۆنی زەرد.
هەوڵەكانی تاڵەبانی كوڕ لە كاتێكدایە لە ناوچەكانی ژێر دەسەڵاتی كە ماوەیەك بە زۆنی هاوبەشی سەوز و نیلی، وەك ئاماژەیەك بۆ بزوتنەوەی گۆڕان ناوی دەهێنرا، ئێستا و دوای پاشەكشێی گۆڕان و نەمانی سەنگی لە هەڵبژاردنی پەرلەمانی عێراق، بە تەنیا یەكێتیی لە ناوچەكەدا حوکمڕانەو قسەی هەیە.
سەرچاوەكەی پەرەگراف وتی "لەناوخۆی یەکێتی کەس ناوێرێت قسە لە قسەی کاک بافڵدا بکات، بەڵام گوێ بۆ چەند کەسێکی دەرەوەی یەکێتی دەگرێت بەتایبەت هەندێک کە پەرلەمانتاری چالاکن لە تۆڕە کۆمەڵایەتییەکان".
بافڵ تاڵەبانی لەکاتی سەردانێکی بۆ بارەگای هێزەکانی کۆماندۆ، ٨-١١-٢٠٢٢. وێنە؛ پەیجی بافڵ تاڵەبانی لە فەیسبوک.
یەکێتی بە درێژایی مێژوو وای پیشانداوە کە پشتیوانی لە ئازادی، بەتایبەت ئازادی ڕۆژنامەوانی دەکات، بە تایبەت لە سەردەمی تاڵەبانی باوك، كە ئێستا كوڕە گەورەكەی بانگەشەی گەڕانەوە بۆ ئەو ڕێبازە دەکات، لە سلێمانی یەكەم میدیای ئەهلی و كەناڵی ئاسمانی دەرەوەی حزب پەیدا بوو، بەڵام زۆری نەبرد و ئەو بانگەشەیە بە هەڵمەتی سەركوتكردن و دەستگیركردن لەق بوو.
لە مانگی ئابی ئەمساڵەوە بەلایەنی کەمەوە 28 ڕۆژنامەنووس لەو ناوچانە دەستگیرکراون کە لەلایەن یەکێتیەوە کۆنتڕۆڵکراون، لەناویاندا پەیامنێری پەرەگراف لە سلێمانی لەکاتی ڕووماڵی خۆپیشاندانەکانی جوڵانەوەی نەوەی نوێ لە ٦ی ئاب، لەو خۆپیشاندانەدا سەدان کەس لە خۆپیشاندەر و بەرپرسانی نەوەی نوێ و چالاکانی مەدەنی دەستگیرکران. ڕوبەڕوبوونەوەی تووندی خۆپیشاندەران و هەڵمەتی دەستگیرکردن لە ڕۆژانی دواتریشدا بەرامبەر خۆپیشاندانەکانی خوێندکارانی زانکۆی سلێمانی بەردەوام بوون.
سەرەتای مانگی 10ـی ئەمساڵ کاتێک دوو ڕۆژنامەنووس لە سلێمانییەوە بەرەو هەولێر دەگەڕانەوە، هێزی دژەتیرۆری یەکێتی دەستگیری کردن، دوای هەفتەیەک مانەوە لە زیندانی ئاسایش ئەوکات بافڵ تاڵەبانی ڕایگەیاند، "سلێمانی شوێنێک نییە بۆ زیندانیکردن و ئازاردانی رۆژنامەنووس و نووسەران، بەڵکو جێگەیەکە بۆ رێزگرتن لە رەخنە و ئازادییەکانی رۆژنامەنووسان و خاوەن قەڵەمە ئازاو بوێرەکان".
هەمان ڕۆژی بڵاوکردنەوەی ئەو پەیامە بە دەستێوەردانی تاڵەبانی دوو ڕۆژنامەنووسەکە ئازادکران و میدیاکانی یەکێتی وەک دەسکەوتی سەرۆکی حیزبەکەیان گواستیانەوە.
عەدنان عوسمان، کە پێشتر پەرلەمانتارو بەرپرسی باڵای گۆڕان و بەرلەوەش سەرنووسەری ڕۆژنامەی هاوڵاتی بووە، دەستگیرکردنی ئەو دوو ڕۆژنامەنووسەی بە "ترساندن و تۆقاندنی رۆژنامەنوسان و ئیعلان کردنی هاتنی سەردەمی بەرتەسککردنەوەو کۆنتڕۆڵکردنی ئازادیی رەخنەو نوسین" لەقەڵەمدا.
"ئەم بەڕێزانەی قیادەی تازەی یەکێتی، دەبێ شتێک بە رونی بزانن: ئەوان ئەتوانن دەیان بەرپرسی باڵاو گەورەی حزبەکەیان گۆشەگیر و بێدەنگ بکەن، سەدەها کادر و فەرماندە بە هەر شێوازێک بێت کەنارگیر و ملکەچ بکەن، بەڵام هەیهات بتوانن دەنگی ئازادیخوازانی ئێرە کە هەمیشە لانکەی رای ئازاد و قبوڵکردنی جیاوازی و سەرکەشی بوە، خەفەو سەرکوت بکەن" عەدنان عوسمان وادەڵێت.
دەستگیرکردن و زیندانیکردنی ڕۆژنامەنووسان و پێشێلکردنی مافەکانیان، بەشێکن لە نیگەرانییە بەردەوامەکانی كۆمەڵگەی نێودەوڵەتی و وڵاتانی هاوپەیمان و دۆستی کورد.
لە دوو ساڵی ڕابردوودا دەیان رۆژنامەنوس و چالاكوان لە هەولێر و بادینان دەستگیركران و سەرباری ناڕەزایی نێودەوڵەتی، بەڵام زۆرینەیان بە تۆمەتی جیاواز حوكمدران.
لە 17ـی تشرینی یەكەمی ئەمساڵ، ئێرڤن هیکس کونسوڵی گشتی ئەمەریکا لە هەولێر، لە لێدوانێکی نووسراودا کە بۆ پەرەگراف نێردرا، ڕایگەیاند، نیگەرانن لە دەستگیرکردن و ڕاگرتنی ڕۆژنامەنوسان بە تۆمەتێک کە پەیوەستە بەکاری ڕۆژنامەنوسییانەوە.
کونسوڵی گشتی ئەمەریکا ئەوەشی خستەڕوو، برەودان بە دیموکراسی و مافەکانی مرۆڤ و ئازادی ڕاگەیاندن لە کارە هەرە لە پێشەکانیانەو هانی حکومەتی هەرێم دەدەن بۆ ڕێگرتن لە توندوتیژی لەسەر بنەمای جێندەری و لێپرسینەوە لەوانەی لە توندوتیژی دژی ژنان تێوەگلاون.
بافڵ تاڵەبانی جگە لەو نمایشی هێز و دەسەڵاتەی لە سلێمانی دەیكات؛ چەندین مانگە لەگەڵ پارتیی دیموكراتیی هاوپەیمانیان لە حكومەتدا، تۆمەتی قورس لەسەر دۆسیەی ئەمنیی ئاڕاستەی یەكتریی دەكەن، هەڕەشە دەكەن و تاگەیشتە ئەوەی سەرۆکی تیمی یەکێتی لە حکومەت بایكۆتی حكومەت بكات بەهۆی کێشەکانیان و بە پاساوی ناشەفافیەت و ناعەدالەتی، لەهەموو ئەمانەشدا پشكی شێری لێكەوتەكان بەر خەڵك دەكەون و بەهۆیەوە بازاڕ ناسەقامگیرتر بووە.
وەك هەندێك لە هەڵسەنگاندنی هەنگاوەكانیدا دەڵێن؛ ئێستا كاتی ئاگادارکردنەوەی بافڵ تاڵەبانییەو دەبێت بڕیارەكان بەجێبهێڵێت بۆ یاسا، دەسەڵاتی یاسادانان و جێبەجێكردن، هێز بۆ پاراستنی ئارامی و سەرباز بۆ دەرەوەی شار و كاتی شەڕ و تۆكمەكردنی سنورەكان بێت نەك چەقی شار، ئاوڕ لە رابردوی شار بداتەوە و لانیكەم بگەڕێتەوە بۆ سەردەمی تاڵەبانی باوك و هێرۆ ئیبراهیم ئەحمەدی دایكی لە دۆسیەکانی پشتوانیی لە ئازادی و مافەكانی مرۆڤ و بەتایبەت ژناندا، ئەگەر هەنگاوی باشتر و كاریگەرتر لەوان نانێت.